Print

STABAT MATER

STABAT MATER

 

Lassù sel Calvari davsin a la Cros,

a-i è ‘dco Maria crasà dal dolor

ant el veddi un Fieul dij pi’ afetuos,

a meuri parèj d’un gross malfator.

Je sgiaf e ‘l patele ed coi scalmanà

A son na tortura al cheur angossà.

 

La tera termola el cel s’escuris

A veddi li’ a meuri un Dio sna cros;

edcò la natura a inoridis

perché mai delit l’è steit pi’ ontos.

L’Agnel inossent ch’a paga ij peccà,

a l’è li’ da Sol ch’a meur dissanguà.

 

Ij colp che ij soldà l’han deit con el martel

A son per soa mama ed lame ed cotej;

le spine ‘n tla testa je spuv e ij flagei.

La spà profetà dal vej Simeon

A l’è realtà papi’ na vision!

 

Gesù a la varda e a-j dis con amor:

“ D’ancheuj, en Ti mama edcò ij omini troveran

Na Mama amorosa mach tuta per lor;

na Guida sicura ch’a-j pija per man.

E coma l’è steit per l’Incarnassion,

da Ti a passerà la mia Redenssion”.

 

Maria che un di’ a l’Angel Gabriel

avia già dije un Si generos,

ades as carija edco cost fardel

ch’a l’ha afidaje so Fieul da sla Cros.

Perej da un Patibol ed pen-a ‘nfinija

Gesù an fa un argal: soa Mama, Maria!                

 

                                                                         Giovenale Tallone
 
   

Visitors

Flag Counter